18થી 20 ડિસેમ્બર દરમિયાન જિયો વર્લ્ડ કન્વેન્શન સેન્ટરમાં યોજાશે WHC 2026; 60થી વધુ દેશોના પ્રતિનિધિઓની ઉપસ્થિતિ — ‘સમાનં વ્રતં સહ ચિત્તમ્’ રહેશે સંમેલનનો કેન્દ્રીય મંત્ર
રાજકોટ, 22 ઑગસ્ટ 2026: વિશ્વભરના હિન્દુ સમાજના પ્રતિનિધિત્વ, સંવાદ, ચિંતન અને સંગઠિત પ્રયાસોને એક વૈશ્વિક મંચ પ્રદાન કરતું વર્લ્ડ હિન્દુ કોંગ્રેસ 2026 આ વર્ષે મુંબઈમાં યોજાવા જઈ રહ્યું છે. 18, 19 અને 20 ડિસેમ્બર 2026 દરમિયાન મુંબઈ સ્થિત જિયો વર્લ્ડ કન્વેન્શન સેન્ટર ખાતે યોજાનાર આ મહાસંમેલનનો કેન્દ્રીય વિષય ‘સમાનં વ્રતં સહ ચિત્તમ્’ એટલે કે સમાન સંકલ્પ અને સામૂહિક દૃઢતા રાખવામાં આવ્યો છે.
ત્રણ દિવસીય આ વૈશ્વિક મહાસંમેલનમાં ભારત સહિત વિશ્વના વિવિધ દેશોમાંથી હિન્દુ સમાજના નેતાઓ, વિચારકો, ઉદ્યોગસાહસિકો, નીતિ નિર્માતાઓ, શિક્ષણવિદો, પત્રકારો તથા સામાજિક ક્ષેત્રના અગ્રણીઓ એકત્રિત થશે. ધર્મ, સંસ્કૃતિ, શિક્ષણ, અર્થવ્યવસ્થા, સામાજિક સંગઠન અને વૈશ્વિક હિન્દુ સમાજના ભાવિ અંગે અહીં વ્યાપક વિચારવિમર્શ અને મંથન થવાનું છે.
સાત ક્ષેત્રોમાં વૈશ્વિક ચિંતનનું સમવાયી મંચ :
WHC 2026 અંતર્ગત હિન્દુ સમાજના વિવિધ ક્ષેત્રોને આવરી લેતા સાત સમાંતર સંમેલનો યોજાશે. તેમાં વર્લ્ડ હિન્દુ ઇકોનોમિક ફોરમ, હિન્દુ એજ્યુકેશન કોન્ફરન્સ, હિન્દુ મીડિયા કોન્ફરન્સ, હિન્દુ પોલિટિકલ કોન્ફરન્સ, હિન્દુ વુમન કોન્ફરન્સ, હિન્દુ યુથ કોન્ફરન્સ અને હિન્દુ ઓર્ગેનાઇઝેશનલ કોન્ફરન્સનો સમાવેશ થાય છે.
આ સમાંતર મંચો દ્વારા હિન્દુ સમાજની બૌદ્ધિક ક્ષમતા, સર્જનશીલતા, ઉદ્યોગસાહસ, સામાજિક પ્રતિબદ્ધતા અને સંગઠનશક્તિને એકસૂત્રે સાંકળી તેને વૈશ્વિક પરિપ્રેક્ષ્યમાં નવી ઊર્જા આપવાનો પ્રયાસ કરવામાં આવશે.
બેંગકોક બાદ હવે મુંબઈમાં નવો અધ્યાય :
વર્લ્ડ હિન્દુ કોંગ્રેસની અગાઉની આવૃત્તિ નવેમ્બર 2023માં બેંગકોક, થાઈલેન્ડ ખાતે યોજાઈ હતી. અત્યાર સુધીના સંમેલનોમાં 60થી વધુ દેશોના 6,500થી વધુ પ્રતિભાગીઓની સક્રિય ઉપસ્થિતિ નોંધાઈ ચૂકી છે.
અગાઉના સંમેલનોમાં પરમ પૂજનીય દલાઈ લામા, માતા અમૃતાનંદમયી, રાષ્ટ્રીય સ્વયંસેવક સંઘના સરસંઘચાલક ડૉ. મોહન ભાગવત, કેન્દ્રીય નાણામંત્રી શ્રીમતી નિર્મલા સીતારમણ, શ્રી અજય પિરામલ અને ઇતિહાસકાર વિક્રમ સંપત સહિતની અનેક પ્રતિષ્ઠિત વિભૂતિઓ ઉપસ્થિત રહી ચૂકી છે.
અજય પિરામલને અધ્યક્ષપદની જવાબદારી :
પિરામલ ગ્રુપના ચેરમેન શ્રી અજય પિરામલને WHC 2026ના અધ્યક્ષ તરીકે જવાબદારી સોંપવામાં આવી છે. જ્યારે શ્રી વિષાદ મફતલાલ અને શ્રી મહેશ ભાગચંદકાની સહ અધ્યક્ષ તરીકે નિમણૂક કરવામાં આવી છે.
આ આયોજન માત્ર વૈચારિક સંમેલન પૂરતું સીમિત ન રહે, પરંતુ વિશ્વભરના પ્રતિનિધિઓ વચ્ચે સંવાદ, સહકાર, નેટવર્કિંગ અને નક્કર કાર્યયોજનાના નિર્માણનું સશક્ત કેન્દ્ર બને તેવો તેનો મુખ્ય ઉદ્દેશ્ય છે.
હિન્દુ આકાંક્ષાઓને સાકાર કરવાનો સમય :
વર્લ્ડ હિન્દુ કોંગ્રેસના પ્રણેતા સ્વામી વિજ્ઞાનંદજીએ જણાવ્યું હતું કે હિન્દુ સમાજ આજે અગાઉની એક સદીની તુલનામાં વધુ દૃશ્યમાન, સ્વીકાર્ય અને સન્માનનીય સ્થિતિમાં પહોંચ્યો છે. હવે સંગઠિત શક્તિ અને દૃઢ સંકલ્પ સાથે હિન્દુ સમાજની આકાંક્ષાઓને સાકાર કરવાનો સમય આવી ગયો છે તથા એકતાની કસોટીરૂપ પડકારોનો સામનો કરવો આવશ્યક છે.
તેમના મતે, વૈશ્વિક સ્તરે હિન્દુ સમાજની વધતી જતી સક્રિયતા અને સ્વીકૃતિને એક સુસંગત દિશા આપવી એ વર્તમાન સમયની મહત્ત્વપૂર્ણ આવશ્યકતા છે.
હિન્દુ ચિંતનને વૈશ્વિક મહત્વાકાંક્ષાઓ સાથે જોડતું મંચ :
WHC 2026ના અધ્યક્ષ શ્રી અજય પિરામલે જણાવ્યું હતું કે, “વર્લ્ડ હિન્દુ કોંગ્રેસ એવું મંચ છે, જે હિન્દુ ચિંતનને વૈશ્વિક મહત્વાકાંક્ષાઓ સાથે જોડે છે. આ ડિસેમ્બરમાં મુંબઈમાં અમે 60થી વધુ દેશોના 4,500થી વધુ પ્રતિભાગીઓ સાથે એકત્રિત થઈશું, જે આ આંદોલનની વધતી જતી વૈશ્વિક સ્વીકૃતિનું પ્રમાણ છે.”
દિલ્હીની શરૂઆતથી મુંબઈ સુધીની વૈશ્વિક યાત્રા :
દર ચાર વર્ષે યોજાતા વર્લ્ડ હિન્દુ કોંગ્રેસની વૈશ્વિક યાત્રાનો પ્રારંભ 2014માં નવી દિલ્હીથી થયો હતો. ત્યારબાદ 2018માં શિકાગો અને 2023માં બેંગકોક ખાતે તેનું આયોજન થયું. હવે 2026માં મુંબઈ આ વૈશ્વિક મહાસંમેલનના આગામી અધ્યાયનું યજમાન બનશે.
યતો ધર્મસ્તતો જયઃ એટલે કે જ્યાં ધર્મ છે, ત્યાં વિજય છે,ની ભાવનાને કેન્દ્રસ્થાને રાખીને આગળ વધતું WHC 2026 વિશ્વભરના હિન્દુ સમાજના વિવિધ ક્ષેત્રોને એક સમન્વિત મંચ પર લાવવાનો પ્રયાસ કરશે.
સમાન સંકલ્પથી સામૂહિક દૃઢતા તરફ :
મુંબઈમાં યોજાનાર WHC 2026 વૈશ્વિક હિન્દુ સમાજના વિવિધ પ્રવાહો, પ્રતિભાઓ અને સંસ્થાઓને એક જ મંચ પર લાવી ચિંતનથી સંકલ્પ અને સંકલ્પથી ક્રિયાશીલતા તરફ આગળ વધવાની દિશા પ્રસ્થાપિત કરશે. ‘સમાનં વ્રતં સહ ચિત્તમ્’નો મંત્ર આ મહાસંમેલનના સમગ્ર આયામોને એકસૂત્રમાં પરોવતો કેન્દ્રીય વિચાર બની રહેશે.
