કાશી : રાષ્ટ્રીય સ્વયંસેવક સંઘ, કાશી મધ્યના તિલક નગર ખાતે આયોજિત રક્ષાબંધન ઉત્સવને સંબોધતા સંઘના સરકાર્યવાહ દત્તાત્રેય હોસબાલે જીએ જણાવ્યું હતું કે, “આપણી એકતા અને એકાત્મતા વિશ્વ બંધુતાના સંરક્ષણ અને સંવર્ધનનો આધાર છે.”
તેમણે જણાવ્યું હતું કે, ન્યાયોચિત માર્ગ પર ચાલીને બંધુતાને આધાર બનાવી સ્વતંત્રતા અને સમાનતાની રક્ષા કરવા માટે ભારતે સામાજિક સમરસતાને સ્વીકારી છે.
સિગરા સ્થિત ડૉ. સંપૂર્ણાનંદ સ્પોર્ટ્સ કોમ્પ્લેક્સમાં ઉપસ્થિત સ્વયંસેવકો અને માતૃશક્તિને સંબોધતા સરકાર્યવાહ જીએ યોગ વશિષ્ઠના એક શ્લોકનો ઉલ્લેખ કરતાં જણાવ્યું હતું કે, જે લોકો આપણા બંધુ નથી, તેમની સાથે દરરોજ મળવાથી નિકટતા વધે છે અને તેઓ આપણા બંધુ બની જાય છે. જ્યારે નિકટતાના આ અભ્યાસને છોડી દેવામાં આવે છે, ત્યારે બંધુતાનું સ્નેહબંધન છૂટી જાય છે. રાષ્ટ્રીય સ્વયંસેવક સંઘમાં પણ અપરિચિતને પરિચિત અને પરિચિતને મિત્ર બનાવવાની પરંપરા રહી છે.
તેમણે કહ્યું કે, સ્વતંત્રતા, સમાનતા અને બંધુતા-આ ત્રણેય વિભાવનાઓને વિશ્વના અનેક દેશોએ અલગ-અલગ સ્વરૂપોમાં સ્વીકારી છે. જે રાષ્ટ્રોમાં માત્ર સ્વતંત્રતાને મહત્વ આપવામાં આવ્યું, ત્યાં સ્વચ્છંદતા વ્યાપી ગઈ. જ્યારે સોવિયેત રશિયા જેવા દેશોએ સમાનતાને પ્રાથમિકતા આપી, ત્યારે આ વિચાર પણ ટકી શક્યો નહીં. ભારતીય સંસ્કૃતિમાં બંધુતાને સ્વતંત્રતા અને સમાનતા સાથે જોડવામાં આવી છે. આ ત્રણેય તત્ત્વોનો મૂળ આધાર સામાજિક સમરસતા છે.
સમગ્ર વિશ્વ એક કુટુંબ :
સરકાર્યવાહ જીએ જણાવ્યું હતું કે, હિન્દુ સંસ્કૃતિમાં સમગ્ર વિશ્વને એક કુટુંબ તરીકે સ્વીકારવામાં આવ્યું છે. “હું અને સમગ્ર જીવસૃષ્ટિ એક જ પરમાત્માના અંશ છીએ” - આ ભાવનાને ઉદાર ચરિત્ર સાથે સ્વીકારવી જોઈએ.
તેમણે જણાવ્યું કે, સંબંધોની વચ્ચેનો અવિશ્વાસ રક્ષાબંધનના સ્નેહસૂત્રને નબળું બનાવે છે. જ્યારે આપણે પરસ્પર વિભાજિત થઈએ છીએ, ત્યારે વિરોધી પક્ષને તેનો લાભ મળે છે.
વિશ્વ બંધુત્વની ચર્ચા કરતાં તેમણે ભવિષ્ય પુરાણના શ્લોકનો ઉલ્લેખ કર્યો -
“યેન બદ્ધો બલી રાજા દાનવેન્દ્રો મહાબલઃ।
તેન ત્વામભિબધ્નામિ રક્ષે મા ચલ મા ચલ॥”
આ શ્લોકનો અર્થ સમજાવતા તેમણે જણાવ્યું કે, જે રીતે મહાબળવાન દાનવેન્દ્ર રાજા બલિને સ્નેહબંધનમાં બાંધવામાં આવ્યા હતા, તે જ રીતે હું પણ તમને સ્નેહબંધનમાં બાંધું છું. આ બંધન સ્થિર રહે, અડગ રહે.
સરકાર્યવાહ જીએ કહ્યું કે, વર્તમાન સમયમાં પરિવાર અને સમાજમાં જે અસ્થિરતા ઊભી થઈ છે, તેનું મુખ્ય કારણ સ્વાર્થ છે. મનુષ્યના અંતરમાં સ્વાર્થ વિકારના રૂપમાં પ્રવેશવો જોઈએ નહીં.
ભગવા ધ્વજને રક્ષાસૂત્ર અર્પણ :
કાર્યક્રમના પ્રારંભમાં સરકાર્યવાહ દત્તાત્રેય હોસબાલે જી, કાશી મધ્યના સંઘચાલક ડૉ. હેમંત ગુપ્ત જી તથા તિલક નગરના નગર સંઘચાલક પ્રદીપ જીએ ભગવા ધ્વજને રક્ષાસૂત્ર બાંધ્યું.
નેપાળની કુદરતી આપદાના પીડિતો પ્રત્યે શ્રદ્ધાંજલિ :
બે દિવસ પૂર્વે નેપાળમાં આવેલી પૂર આપદામાં મૃત્યુ પામેલા લોકો પ્રત્યે રાષ્ટ્રીય સ્વયંસેવક સંઘના સરકાર્યવાહ દત્તાત્રેય હોસબાલે જીએ સમગ્ર સંઘ પરિવાર વતી શ્રદ્ધાંજલિ અર્પણ કરી હતી.
તેમણે જણાવ્યું હતું કે, આ આપદામાં જે બંધુઓ સંકટગ્રસ્ત થયા છે, તેમના પ્રત્યે પણ સંઘ પરિવાર પોતાની ઊંડી સંવેદના વ્યક્ત કરે છે.
