નાગપુર, તા. 11 મે 2026
રાષ્ટ્રીય સ્વયંસેવક સંઘ દ્વારા આયોજિત કાર્યકર્તા વિકાસ વર્ગ-દ્વિતીયનો ભવ્ય પ્રારંભ આજે નાગપુરના રેશીમબાગ સ્થિત ડૉ. હેડગેવાર સ્મૃતિ ભવન પરિસરના મહર્ષિ વ્યાસ સભાગૃહ ખાતે થયો હતો. સંઘના શતાબ્દી વર્ષ નિમિત્તે યોજાઈ રહેલા આ વિશેષ પ્રશિક્ષણ વર્ગમાં દેશભરના 880 શિક્ષાર્થીઓ ઉત્સાહપૂર્વક સહભાગી બન્યા છે.
વર્ગના ઉદ્ઘાટન પ્રસંગે સહ સરકાર્યવાહ અતુલ લિમયે જી, સહ સરકાર્યવાહ રામદત્ત જી તેમજ જયપુર પ્રાંત સંઘચાલક અને વર્ગના સર્વાધિકારી મહેન્દ્રસિંહ મગ્ગો જી ઉપસ્થિત રહ્યા હતા. મહાનુભાવોએ ભારત માતાની પ્રતિમાને પુષ્પાંજલિ અર્પણ કરીને વર્ગનો પ્રારંભ કરાવ્યો હતો.
આ પ્રશિક્ષણ વર્ગ દરમિયાન સામાજિક જાગૃતિ, રાષ્ટ્રીય ચેતના અને સમાજ પરિવર્તન સંબંધિત વિવિધ વિષયો પર માર્ગદર્શન અને તાલીમ આપવામાં આવશે. કાર્યકર્તાઓના વ્યક્તિત્વ નિર્માણ સાથે સંગઠનાત્મક દૃઢતા અને સમાજ પ્રત્યેની જવાબદારીની ભાવના વિકસે તે હેતુસર વિવિધ સત્રોનું આયોજન કરવામાં આવ્યું છે.
આ અવસરે સહ સરકાર્યવાહ અતુલ લિમયે જીએ જણાવ્યું હતું કે,
“આપણે બધા એક છીએ — એવી એકાત્મતાની અનુભૂતિ આવા વર્ગોમાંથી જ પ્રાપ્ત થાય છે. રાષ્ટ્રજીવનમાં સમરસતા, એકતા અને પરસ્પર આત્મીયતા મજબૂત બને તે માટે આવા પ્રશિક્ષણ વર્ગો અત્યંત મહત્વપૂર્ણ છે.”
આ વર્ગ દ્વારા દેશભરના કાર્યકર્તાઓમાં રાષ્ટ્રીય વિચાર, સંગઠન શક્તિ અને સમાજસેવાની ભાવનાને વધુ મજબૂત બનાવવાનો પ્રયાસ કરવામાં આવી રહ્યો છે.
